Duotrav - დუოტრავი თვალის წვეთები 2.5მლ

გამოყენების ინსტრუქცია

დუოტრავი 40 მკგ/მლ + 5 მგ/მლ თვალის წვეთები, სტერილური ხსნარი
გამოიყენება თვალში ჩაწვეთების გზით.
სტერილური.

• აქტიური ნივთიერება: ტრავოპროსტი 40 მკგ/მლ და ტიმოლოლი 5 მგ/მლ (6.8 მგ ტიმოლოლის მალეატის ექვივალენტი).
• დამხმარე ნივთიერება(ები): პოლიქვატერნიუმი-1 (პოლიქვადი), მანიტოლი (E421), პროპილენ გლიკოლი (E1520), ჰიდროგენირებული პოლიოქსიეთილენის აბუსალათინის ზეთი 40 (HჩO-40), ბორის მჟავა, ნატრიუმის ქლორიდი, ნატრიუმის ჰიდროქსიდი და/ან ჰიდროქლორის მჟავა (პH-ის დარეგულირებისთვის), გამოხდილი წყალი.

პრეპარატის გამოყენებამდე საჭიროა ინსტრუქციის ყურადღებით წაკითხვა, რადგან ის პაციენტისთვის მნიშვნელოვან ინფორმაციას შეიცავს
 საჭიროა ინსტრუქციის შენახვა. შესაძლოა წარმოიშვას მისი ხელახალი გაცნობის აუცილებლობა.
 დამატებითი კითხვების არსებობის შემთხვევაში, პაციენტმა უნდა მიმართოს მკურნალ ექიმს ან ფარმაცევტს.
 ეს პრეპარატი განკუთვნილია მხოლოდ პირადი მოხმარებისთვის. დაუშვებელია პრეპარატის სხვისთვის მიცემა.
 კლინიკაში ვიზიტისას ან ექიმთან კონსულტაციისას, პაციენტმა უნდა აცნობოს ექიმს ამ პრეპარატის გამოყენების შესახებ.
 პრეპარატის მიღება უნდა მოხდეს ინსტრუქციაში მოცემული წესით. დაუშვებელია რეკომენდებულზე მაღალი ან დაბალი დოზის გამოყენება.

ინსტრუქციაში მოცემულია:

1. რას წარმოადგენს დუოტრავი და რისთვის გამოიყენება იგი
2. რა უნდა იცოდეს პაციენტმა დუოტრავის გამოყენებამდე
3. დუოტრავის მიღების წესი
4. შესაძლო გვერდითი მოვლენები
5. დუოტრავის შენახვის წესი

სათაურები მოცემულია.

1. რას წარმოადგენს დუოტრავი და რისთვის გამოიყენება იგი

• დუოტრავი 2.5 მლ თვალის წვეთები, გამჭვირვალე, უფერო ხსნარი, მოთავსებული სრულად პოლიპროპილენის ოვალურ Dროპ-თაინერ® ფლაკონში საცობით და საწვეთურით.
• დუოტრავი გამოიყენება მაღალი თვალშიდა (ინტრაოკულური) წნევის სამკურნალოდ მოზრდილებში, ხანდაზმული ასაკის ჩათვლით. მაღალმა თვალშიდა წნევამ შესაძლოა გამოიწვიოს დაავადება - გლაუკომა.
• დუოტრავი წარმოადგენს ორი აქტიური ნივთიერებისგან შემდგარ პრეპარატს (ტრავოპროსტი და ტიმოლოლი). ტრავოპროსტი წარმოადგენს პროსტაგლანდინების ანალოგს, რომელიც ამცირებს თვალშიდა წვევას თვალში სითხის მიმოქცევის გაუმჯობესების გზით. ტიმოლოლი წარმოადგენს ბეტა-ბლოკატორს, რომელიც ამცირებს თვალში სითხის წარმოქმნას. აღნიშნულ ნივთიერებებს გააჩნიათ სინერგიული მოქმედება თვალშიდა წნევის შესამცირებლად.

2. რა უნდა იცოდეს პაციენტმა დუოტრავის გამოყენებამდე

დუოტრავი არ გამოიყენება:
• თუ პაციენტი ალერგიულია ტრავოპროსტის, პროსტაგლანდინების, ტიმოლოლის, ბეტა-ბლოკატორების ან პრეპარატში შემავალი რომელიმე დამხმარე ნივთიერების მიმართ;
• თუ პაციენტს ჰქონია ან აქვს სუნთქვასთან ასოცირებული პრობლემები, მაგ. ასთმა, მძიმე ქრონიკული ობსტრუქციული ბრონქიტი (საშიში ფილტვისმიერი მდგომარეობა, რომელიც იწვევს ვიზინგს, სუნთქვის გაძნელებას და/ან პროლონგირებად ხველას) ან სხვა რესპირატორული პრობლემები;
• თუ პაციენტს აქვს ძლიერი ურტიკარია (ჭინჭრის ციება);
• თუ პაციენტს აქვს ბრადიკარდია, გულის უკმარისობა ან გულის რიტმის დარღვევა (არითმია);
• 18 წლამდე ასაკის ბავშვებსა და მოზარდებში.

შემდეგ შემთხვევებში დუოტრავი გამოიყენება განსაკუთრებული სიფრთხილით:
პაციენტმა უნდა მიმართოს ექიმს თუ აქვს ან ჰქონია შემდეგი მდგომარეობებიდან რომელიმე:
• გულის კორონარული დაავადება (სიმპტომები მოიცავს ტკივილს ან მოჭერის შეგრძნებას გულმკერდის არეში, ქოშინს ან მოხრჩობის შეგრძნებას), გულის უკმარისობა, არტერიული ჰიპოტენზია (დაბალი არტერიული წნევა);
• გულის რიტმის დარღვევები, მაგ. ბრადიკარდია;
• რესპირატორული პრობლემები, მაგ. ასთმა ან ფილტვების ქრონიკული ობსტრუქციული დაავადება;
• სისხლის მიმოქცევის დარღვევები (რეინოს ფენომენი ან რეინოს სინდრომი);
• დუოტრავმა შესაძლოა შენიღბოს ჰიპოგლიკემიასთან ასოცირებული სიმპტომები (მაგ. ტრემორი ან თავბრუსხვევა) შაქრიანი დიაბეტის მქონე პაციენტებში. დუოტრავით მკურნალობის პერიოდში საჭიროა სისხლში შაქრის დონის მკაცრი კონტროლი;
• ტიმოლოლმა შესაძლოა შენიღბოს ფარისებრი ჯირკვლის დარღვევების (მაგ. ჰიპერთირეოზის) სიმპტომები;
• მიასთენია გრავის (კუნთების სისუსტის ტიპი);
• პაციენტმა დუოტრავით მკურნალობის დაწყებამდე უნდა მიმართოს ექიმს თუ მას გადატანილი აქვს ქირურგიული ჩარევა კატარაქტას სამკურნალოდ;
• ანამნეზში არსებული ან მიმდინარე ანთება თვალის მიდამოში.

პაციენტმა უნდა აცნობოს ექიმს დუოტრავით მკურნალობის შესახებ თუ დაგეგმილი აქვს ნებისმიერი სახის ქირურგიული ოპერაცია, ვინაიდან ტიმოლოლმა შესაძლოა გავლენა იქონიოს ზოგიერთი საანესთეზიო პრეპარატის მოქმედებაზე.
დუოტრავით მკურნალობის პერიოდში, ნებისმიერი მიზეზით, ძლიერი ალერგიული რეაქციის განვითარების შემთხვევაში, ადრენალინი შესაძლოა არ აღმოჩდეს სათანადოდ ეფექტური. ამიტომ, მნიშვნელოვანია ექიმს ეცნობოს დუოტრავის გამოყენების შესახებ, ნებისმიერი სხვა მკურნალობის მიღებამდე.
დუოტრავმა შესაძლოა შეცვალოს ირისის (თვალის ფერადი გარსი) ფერი. აღნიშნული შესაძლოა იყოს შეუქცევადი ხასიათის.
დუოტრავმა შესაძლოა გამოიწვიოს წამწამების სიგრძის, სისქის და/ან რაოდენობის ზრდა და შესაძლოა განაპირობოს თმის უჩვეულო ზრდა ქუთუთოებზე.
ტრავოპროსტი შეიწოვება კანიდან, ამიტომ, იგი არ გამოიყენება ორსულებში ან ქალებში, რომლებსაც დაგეგმილი აქვთ ორსულობა. პრეპარატის კანთან ნებისმიერი კონტაქტის შემთხვევაში, საჭიროა შესაბამისი მიდამოს დაუყოვნებლივ ჩამობანა.
პაციენტმა უნდა მიმართოს ექიმს თუ ზემოთ მოცემულიდან რომელიმე ეხება მას ან ეხებოდა წარსულში.

ურთიერთქმედება საკვებთან და სასმელთან

რეკომენდებული წესით გამოყენების შემთხვევაში, საკვები და სასმელი არ ახდენს გავლენას პრეპარატის მოქმედებაზე.

ორსულობა

პრეპარატის მიღებამდე, პაციენტმა უნდა მიმართოს მკურნალ ექიმს ან ფარმაცევტს.
პაციენტმა პრეპარატის მიღებამდე უნდა მიმართოს ექიმს თუ იგი არის ან ფიქრობს, რომ შესაძლოა იყოს ორსულად ან აპირებს დაორსულებას.
ექიმის მითითების გარეშე, პაციენტმა არ უნდა გამოიყენოს დუოტრავი თუ იგი არის ორსულად. ფერტილობის ასაკში მყოფმა პაციენტებმა, დუოტრავით მკურნალობის პერიოდში უნდა გამოიყენონ ჩასახვის საწინააღმდეგო საშუალებები.
პაციენტმა დაუყოვნებლივ უნდა მიმართოს ექიმს ან ფარმაცევტს თუ დუოტრავით მკურნალობის პერიოდში შეიტყობს, რომ არის ორსულად.

ძუძუთი კვება

პრეპარატის მიღებამდე, პაციენტმა უნდა მიმართოს მკურნალ ექიმს ან ფარმაცევტს.
დუოტრავი არ გამოიყენება ძუძუთი კვების პერიოდში, რადგან იგი გამოიყოფა დედის რძეში.

ავტომობილის და სხვა მექანიზმების მართვა

დუოტრავით მკურნალობის პერიოდში, ზოგჯერ, შესაძლოა განვითარდეს მხედველობის გარდამავალი დაბინდვა. აღნიშნულ შემთხვევაში, პაციენტმა არ უნდა მართოს ავტომობილი ან სხვა მექანიზმები.

მნიშვნელოვანი ინფორმაცია დუოტრავის ზოგიერთი ინგრედიენტის შესახებ

პრეპარატში შემავალმა შემდეგმა ნივთიერებებმა შესაძლოა გამოიწვიონ კანისმიერი რეაქციები და კანის გაღიზიანება: ჰიდროგენირებული პოლიოქსიეთილენის აბუსალათინის ზეთი 40 და პროპილენ გლიკოლი.

ურთიერთქმედება სხვა პრეპარატებთან

ბეტა-ბლოკატორების შემცველი თვალის წვეთების პერორალური კალციუმის არხის ბლოკატორებთან, ბეტა ადრენერგული რეცეპტორების ბლოკატორებთან (გამოიყენება ჰიპერტენზიის სამკურნალოდ), ანტიარითმულ პრეპარატებთან (მათ შორის ამიოდარონთან), საგულე გლიკოზიდებთან (გამოიყენება გულის უკმარისობის სამკურნალოდ), პარასიმპატომიმეტურ პრეპარატებთან ან გუანეტიდინთან ერთად გამოყენების შემთხვევაში, შესაძლოა განვითარდეს არტერიული წნევის ვარდნა ან გამოხატული ბრადიკარდია.
დუოტრავმა შესაძლოა შეცვალოს სხვა პრეპარატების, მათ შორის გლაუკომას სამკურნალოდ გამოყნებული სხვა თვალის წვეთების მოქმედება, ან პირიქით, სხვა პრეპარატების გავლენით შესაძლოა შეიცვალოს დუოტრავის მოქმედება.

პაციენტმა უნდა აცნობოს ექიმს თუ იგი ღებულობს ან დაგეგმილი აქვს შემდეგი პრეპარატების მიღება: პრეპარატები, რომლებიც ამცირებენ არტერიულ წნევას, საგულე პრეპარატები, მათ შორის ქინიდინი (გამოიყენება გულის ზოგიერთი დაავადების და მალარიის სამკურნალოდ), ანტიდიაბეტური პრეპარატები, ანტიდეპრესანტები, მათ შორის ფლუოქსეტინი და პაროქსეტინი.

კლონიდინის (გამოიყენება არტერიული ჰიპერტენზიის სამკურნალოდ) უეცარ მოხსნასთან ასოცირებული ჰიპერტენზია შესაძლოა გაძლიერდეს ბეტა-ბლოკატორების გამოყენების შემთხვევაში.

იშვიათად, თვალის ბეტა-ბლოკატორების და ადრენალინის (ეპინეფრინის) ერთდროულად გამოყენების დროს, არსებობს მიდრიაზის (გუგების გაფართოება) განვითარების შემთხვევები.

პაციენტმა უნდა აცნობოს მკურნალ ექიმს ან ფარმაცევტს იმ პრეპარატების (მათ შორის ურეცეპტოდ გასაცემი) შესახებ, რომლებსაც იღებს ან იღებდა უახლოეს წარსულში.

3. დუოტრავის მიღების წესი 

პრეპარატის მიღება უნდა მოხდეს ემხოლოდ ქიმის მითითებების მიხედვით. პაციენტმა უნდა მიმართოს მკურნალ ექიმს ან ფარმაცევტს თუ არ არის დარწმუნებული, რომ წესისამებრ იღებს პრეპარატს.
სწორი გამოყენების ინსტრუქციები და დოზირება/მიღების სიხშირე:
დუოტრავი წარმოადგენს თვალის წვეთებს. დაუშვებელია პრეპარატის სხვა გზით გამოყენება.
მოზრდილები: დუოტრავის ერთი წვეთი, ცალ ან ორივე თვალში, დღეში ერთცხელ, დილით ან საღამოს. პრეპარატის გამოყენება უნდა მოხდეს დღის ერთსა და იმავე დროს. დუოტრავის გამოყენება უნდა მოხდეს ექიმის მიერ რეკომენდებული ვადით. ორივე თვალში ჩაწვეთება საჭიროა მხოლოდ ექიმის მითითებისამებრ.
დუოტრავი გამოიყენება მხოლოდ თვალის წვეთების სახით.
გამოყენების გზა და მეთოდი:

• გახსენით პაკეტი უშუალოდ ფლაკონის პირველ გამოყენებამდე (სურ. 1) და ფლაკონის ეტიკეტზე აღნიშნეთ გახსნის თარიღი.
• აიღეთ დუოტრავის ფლაკონი და სარკე.
• დაიბანეთ ხელები.
• მოხსენით სახურავი.
• დაიჭირეთ ფლაკონი საწვეთურით დაბლა ცერა და საჩვენებელი თითით.
• გადაწიეთ თავი უკან. სუფთა თითით ჩამოწიეთ ქუთუთო იმგვარად, რომ ქვედა ქუთუთოს და თვალს შორის შეიქმნას “ჯიბე” (სურ. 2).
• მიიტანეთ ფლაკონის საწვეთური თვალთან ახლოს. საჭიროების შემთხვევაში შესაძლებელია სარკის გამოყენება.
• ყურადღება მიაქციეთ, რომ საწვეთური არ შეეხოს თვალებს, ქუთუთოებს, მიმდებარე ან სხვა მიდამოს. წინააღმდეგ შემთხვევაში, წვეთები შესაძლოა დაბინძურდეს.
• ფრთხილად დააჭირეთ ფლაკონის ძირს დუოტრავის ერთი წვეთის გადმოსვლამდე.
• ზედმეტად არ მოუჭიროთ ფლაკონს: ფლაკონი განკუთვნილია მხოლოდ ძირზე მსუბუქი დაჭერისთვის (სურ. 3). თუ წვეთი აცდება თვალს, პროცედურა უნდა განმეორდეს.
• დუოტრავის ჩაწვეთების შემდეგ, მიიდეთ თითი თვალისა და ცხვირის კუთხეში (სურ. 4), 2 წუთის განმავლობაში. ამ გზით, შესაძლებელია დუოტრავის ორგანიზმის სხვა მიდამოებში მოხვედრის თავიდან აცილება.
• საჭიროების შემთხვევაში, ზემოთ მოცემული უნდა განმეორდეს მეორე თვალისთვის.
• გამოყენებისთანავე, მჭიდროდ დაახურეთ ფლაკონს სახურავი.
• გამოიყენეთ მხოლოდ ერთი ფლაკონი. გამოყენებამდე არ გახსნათ ფლაკონის პაკეტი.
თუ წვეთი არ ხვდება თვალში, სცადეთ თავიდან.

საჭიროა არაუმცირეს 5 წუთიანი ინტერვალის დაცვა თუ პაციენტი იყენებს სხვა თვალის წვეთებსაც. დაუშცებელია პრეპარატის გამოყენება კონტაქტური ლინზების მოხსნის გარეშე. ხსნარის ჩაწვეთების შემდეგ, კონტაქტური ლინზების გაკეთება დასაშვებია არაუმცირეს 15 წუთში.

სხვადასხვა ასაკობრივი ჯგუფები:

გამოყენება ბავშვებში:

არ გამოიყენება 18 წლამდე ასაკის ბავშვებში.

გამოყენება ხანდაზმული ასაკის პაციენტებში:

გამოიყენება ზრდასრულთათვის განკუთვნილი სტანდარტული დოზები.

გამოყენება განსაკუთრებული მდგომარეობების დროს:

თირკმელების უკმარისობა/ ღვიძლის უკმარისობა:

თირკმელების ან ღვიძლის უკმარისობის დროს დუოტრავის ან ტიმოლოლი 5 მგ/მლ-ის გამოყენების შესახებს კვლევები არ ჩატარებულა.

არსებობს კვლევები ტრავოპროსტის გამოყენების შესახებ ღვიძლის და თირკმელების საშუალო ან მძიმე ხარისხის დაზიანების დროს (კრეატინინის კლირენსი 14 მლ/წთ-მდე). დოზის კორექცია საჭირო არ არის.

პაციენტმა უნდა მიმართოს მკურნალ ექიმს ან ფარმაცევტს თუ ფიქრობს, რომ დუოტრავის მოქმედება არასათანადოდ სუსტი ან ზედმეტად ძლიერია.

დოზის გადაჭარბების შემთხვევაში

საჭიროა შესაბამისი თვალის დაბანა თბილი წყლით. პრეპარატის ჩაწვეთება აღარ უნდა მოხდეს მომდევნო დოზისთვის განკუთვნილ დრომდე.
დოზის გადაჭარბების შემთხვევაში, პაციენტმა უნდა მიმართოს მკურნალ ექიმს ან ფარმაცევტს.

დოზის გამოტოვების შემთხვევაში

შემდეგი დოზის მიღება უნდა მოხდეს ჩვეულ დროს. დღის განმავლობაში შესაბამის თვალში ან თვალებში ერთზე მეტი წვეთი არ არის დასაშვები. გამოტოვებული დოზის ასანაზღაურებლად ორმაგი დოზის გამოყენება არ უნდა მოხდეს.

შესაძლო გვერდითი მოვლენები დუოტრავით მკურნალობის შეწყვეტის შემდეგ

ექიმისგან დამოუკიდებლად დუოტრავით მკურნალობის შეწყვეტის შემთხვევაში, თვალშიდა წვევის კონტროლი ვერ მიიღწევა, რამაც შესაძლოა გამოიწვიოს მხედველობის დაკარგვა.

პრეპარატის გამოყენებასთან დაკავშირებული დამატებითი კითხვებისთვის, პაციენტმა უნდა მიმართოს მკურნალ ექიმს, ფარმაცევტს ან ექთანს.

4. შესაძლო გვერდითი მოვლენები

სხვა პრეპარატების მსგავსად, დუოტრავმა შესაძლოა გამოიწვიოს გვერდითი მოვლენები პაციენტებში, რომლებიც მგრძნობიარენი არიან პრეპარატში შემავალი ნივთიერებების მიმართ.
უმეტეს შემთხვევაში, დუოტრავით მკურნალობის გაგრძელება შესაძლებელია თუ გვერდითი მოვლენები არ ღებულობს სერიოზულ სახეს. ნებისმიერ გაურკვეველ საკითხზე პაციენტმა უნდა მიმართოს მკურნალ ექიმს.
შემდეგი გვერდითი მოვლენებიდან რომელიმეს განვითარების შემთხვევაში, პაციენტმა დაუყოვნებლივ უნდა შეწყვიტოს დუოტრავის გამოყენება და მიმართოს ექიმს ან მიაკითხოს უახლოესი საავადმყოფოს გადაუდებელი დახმარების განყოფილებას.

• ქოშინი;
• ტკივილი გულმკერდის მიდამოში;
• გამონაყარი კანზე.

ზემოთ აღნიშნული წარმოადგენს სერიოზულ გვერდით მოვლენებს. მათგან რომელიმეს განვითარების შემთხვევაში, შესაძლოა საჭირო გახდეს გადაუდებელი სამედიცინო დახმარება ან ჰოსპიტალიზაცია.

გვერდითი მოვლენები მოცემულია განვითარების სიხშირის მიხედვით:
ძალიან ხშირი: მათი განვითარება მოსალოდნელია 10-დან 1-ზე მეტ შემთხვევაში
ხშირი: მათი განვითარება მოსალოდნელია 10-დან 1-ზე ნაკლებ და 100-დან 1-ზე მეტ შემთხვევაში
ნაკლებად ხშირი: მათი განვითარება მოსალოდნელია 100-დან 1-ზე ნაკლებ და 1000-დან 1-ზე მეტ შემთხვევაში
იშვიათი: მათი განვითარება მოსალოდნელია 1000-დან 1-ზე ნაკლებ და 10 000-დან 1-ზე მეტ შემთხვევაში
ძალიან იშვიათი: მათი განვითარება მოსალოდნელია 10 000-დან 1-ზე ნაკლებ შემთხვევაში
უცნობი სიხშირის: არსებული მონაცემების საფუძველზე სიხშირის დადგენა ვერ ხერხდება

ძალიან ხშირი:
• თვალების სიწითლე.

ხშირი:
• თვალის ზედაპირის ანთება თვალის ზედაპირის დაზიანებით;
• თვალების ტკივილი;
• მხედველობის დაბინდვა;
• მხედველობის პათ. ცვლილებები;
• თვალების სიმშრალე;
• თვალების ქავილი;
• დისკომფორტი თავლებში;
• თვალების გაღიზიანების სიმპტომები და ნიშნები (თვალების წვა და ჩხვლეტის შეგრძენა).

ნაკლებად ხშირი:
• თვალების ზედაპირის ანთება;
• ქუთუთოების ანთება;
• კონიუნქტივას შეშუპება;
• წამწამების ჭარბი ზრდა;
• ირისის (თვალის ფერადი გარსი) ანთება;
• თვალების ანთება;
• მომატებული მგრძნობელობა მზის სხივების მიმართ;
• მხედველობის სიმახვილის დაქვეითება;
• თვალების გადაძაბვა;
• თვალისმიერი ალერგია;
• თვალების შეშუპება;
• ჭღბი ცრემლდენა;
• ქუთუთოების სიწითლე;
• თვალების ფერის ცვლილება;
• კანის გამუქება თვალების ირგვლივ;
• ალერგიული რეაქცია აქტიური ნივთიერების მიმართ;
• თავბრუსხვევა;
• თავის ტკივილი;
• არტერიული წნევის დაქვეითება;
• ჰიპერტენზია;
• ქოშინი;
• პათოლოგიური თმის ზრდა;
• პოსტნაზალური წვეთა;
• კანის ანთება და ქავილი;
• ბრადიკარდია.

იშვიათი:
• საცრემლე ჯირკვლების ანთება;
• ‘დაბზარული’ სისხლძარღვები თვალებში;
• ქუთუთოების აქერცვლა;
• წამწამების უჩვეულო პოზიცია;
• წამწამების უჩვეულო ზრდა;
• გაღიზიანებადობა;
• არარეგულარული გულისცემა (გულის რიტმის დარღვევა);
• თმის ცვენა;
• ხმის დარღვევები;
• სუნთქვის გაძნელება;
• ხველა;
• ხახის გაღიზიანება;
• ურტიკარია;
• ღვიძლის ფუნქციური სინჯების პათ. მაჩვენებლები;
• კანის ფერის ცვლილება;
• დაღლილობა;
• ჭარბი წყურვილის გრძნობა;
• დისკომფორტის შეგრძნება ცხვირის მიდამოში;
• შარდის ფერის ცვლილება;
• ტკივილი ხელებსა და ფეხებში.

უცნობი სიხშირის:

• ქუთუთოების ჩამოწევა;
• ‘ჩავარდნილი’ თვლები (თითქოს თვალები შეწეულია შიგნით);
• ირისის (თვალის ფერადი გარსი) ფერის ცვლილება;
• გამონაყარი;
• გულის უკმარისობა;
• ტკივილი გულმკერდის არეში;
• ინსულტი;
• გულისწასვლა;
• დეპრესია;
• ასთმა;
• გულისცემის გახშირება;
• დაბუჟების ან ჩხვლეტის შეგრძნება;
• პალიპტაცია;
• ქვედა კიდურების შეშუპება;
• ცუდი გემო პირში.

დუოტრავთან ასოცირებული გვერდითი მოვლენები, რომლებიც არ იყო ნანახი პაციენტებში, რომლებიც წარსულში იყენებდნენ ტრავოპროსტს ან ტიმოლოლს.
დუოტრავი წარმოადგენს ორი აქტიური ნივთიერების კომბინაციას (ტრავოპროსტი და ტიმოლოლი). სხვა თვალის პრეპარატების მსგავსად, ტრავოპროსტი და ტიმოლოლი (ბეტა-ბლოკატორი) ხვდება სისტემურ ცირკულაციაში. აღნიშნულმა შესაძლოა გამოიწვიოს ისეთი გვერდითი მოვლენები, რომლებიც დამახასიათებელია ბეტა-ბლოკატორების პერორალური ან საინექციო ფორმით გამოყენებისთვის. აღნიშნული გვერდითი მოვლენების განვითარების რისკი უფრო დაბალია თვალის წვეთების გზით გამოყენების დროს.
ქვემოთ ჩამოთვლილი გვერდითი მოვლენები მოიცავს თვალისთვის გამოყენებულ ბეტა-ბლოკატორებთან ან მხოლოდ ტრავოპროსტთან ასოცირებულ გვერდით მოვლენებს:

თვალისმიერი გვერდითი მოვლენები:
ქუთუთოების ანთება, რქოვანა გარსის ანთება, ბადურას ქვედა სისხლძარღვოვანი გარსის განცალკევება ფილტრაციული ოპერაციის შემდეგ, რამაც შესალოა გამოიწვიოს მხედველობის დარღვევები, რქოვანას მგრძნობელობის დაქვეითება, რქოვანა გარსის ეროზია (თვალის კაკლის წინა ნაწილის დაზიანება), მხედველობის გაორება, გამონადენი თვალიდან, შეშუპება Gთვალების ირგვლივ, ქუთუთოების ქავილი, თვალების წინ შეტრიალება სიწითლით, თვალების გაღიზიანება და ჭარბი ცრემლდენა, მხედველობის დაბინდვა (თვალის ბროილს ზედაპირის დაბიდვის ნიშანი), თვალის სისხლძარღვოვანი გარსის (უვეა) შეშუპება, ქუთუთოების ეკზემა, ნათელი წერტილები მხედველობის ველში, თვალების მგრძნობელობის დაქვეითება, პიგმენტაცია თვალებში, გუგების გაფართოება, წამწამების ფერის ცვლილება, წამწამების სტრუქტურის ცვლილება, მხედველობის ველის პათ. ცვლილებები.

ზოგადი გვერდითი მოვლენები:
ყურისა და ლაბირინთის დარღვევები: თავბრუსხვევა, ხმაური ყურებში.

დარღვევები გულის და სისხლის მიმოქცევის მხრივ: ბრადიკარდია, პალპიტქციები, ედემა (შეშუპება), გულისცემის რიტმის ან სიჩქარის ცვლილება, გულის შეგუბებითი უკმარისობა (გულის დაავადება, რომელიც იწვევს ქოშინს და ფეხების შეშუპებას სითხის დაგროვების გამო), არითმიის ტიპი, გულის შეტევა, არტერიული ჰიპოტენზია, რეინოს ფენომენი, ხელების და ფეხების გაციება, სისხლის მიმოქცევის დარღვევა თავის ტვინში.

რესპირატორული: სასუნთქი გზების შევიწროება ფილტვებში (უმეტესად ფილტვებთან ასოცირებული პრობლემების მქონე პაციენტებში), რინორეა ან ცხვირის გაჭედვა, ცემინება (ალერგიული რეაქციის გამო), სუნთქვის გაძნელება, სისხლდენა ცხვირიდან, ცხვირის ღრუს სიმშრალე.

ნევროლოგიური და ზოგადი დარღვევები: ძილის გაძნელება (უძილობა), ღამის კოშმარები, მეხსიერების დაქვეითება, ჰალუცინაციები, ძალისა და ენერგიის დაკარგვა, შფოთვა (ემოციური დისტრესი).

გასტროინტესტინალური: გემოვნების ცვლილებები, გულისრევა, მოუნელებლობა, ფაღარათი, პირის სიმშრალე, მუცლის ტკივილი, ღებინება და ყაბზობა.

ალერგიური: ალერგიული სიმპტომების სიჭარბე, გენერალიზებული ალერგიული რეაქციები, რაც მოიცავს კანქვეშა შეშუპებას სახის ან კიდურების მიდამოში და რომელმაც შესაძლოა გამოიწვიოს სასუნთქი გზების დახშობა სუნთქვის გაძლენებით ან ყლაპვის გაძნელება, ლოკალური ან გენერალიზებული გამონაყარი, ქავილი, უეცარი და ძლიერი, სიცოცხლისთვის საშიში ალერგიული რეაქციები.

კანისმიერი: მოთეთრო მოვერცხლისფრო გამონაყარი კანზე (ფსორიაზიფორმული გამონაყარი) ან ფსორიაზის გაუარესება, კანის აშრევება, თმის სტრუქტურის ცვლილება, კანის ანთება ქავანა გამონაყარით და სიწითლით, თმის ფერის ცვლილება, წამწამების ცვენა, ქავილი, თმის უჩვეულო ზრდა, კანის სიწითლე.

კუნთოვანი: მიასთენია გრავისის (კუნთოვანი დაავადება) სიმპტომების გაუარესება, უჩვეულო შეგრძნებები, მაგ. ჩხვლეტის ან დაბუჟების, კუნთების სისუსტე/დაღლილობა, კუნთებისტკივილი, რომელიც არ არის განპირობებული ვარჯიშით, სახსრების ტკივილი.

დარღვევები თირკმელების და საშარდე სისტემის მხრივ: შარდვის გაძნელება და ტკივილი შარდვისას, შარდის შეუკავებლობა.

რეპროდუქციული დარღვევები: სქესობრივი დისფუნქცია, სქესობრივი ლტოლვის დაქვეითება.

მეტაბოლური დარღვევები: შაქრის რაოდენობის დაქვეითება სისხლში, პროსტატის კიბოს მარკერის მომატებული რაოდენობა სისხლში.

ნებისმერი გვერდითი მოვლენის განვითარების შემთხვევაში, რომელიც არ არის მითითებული ამ ინსტრუქციაში, პაციენტმა უნდა მიმართოს მკურნალ ექიმს ან ფარმაცევტს.

5. დუოტრავის შენახვის წესი

ინახება ბავშვებისთვის მიუწვდომელ ადგილას, თავისივე კოლოფში.
ინახება ოთახის (არაუმეტეს 30ჩ) ტემპერატურაზე.
გამოიყენება შენახვის ვადის გასვლამდე.
დაუშვებელია პრეპარატის გამოყენება შენახვის ვადის გასვლის შემდეგ. შენახვის ვადა მითითებულია კოლოფზე. შენახვის ვადად იგულისხმება მითითებული თვის ბოლო დღე.
კონტამინაციის თავიდან ასაცილებლად, გახსნიდან 4 კვირაში საჭიროა ფლაკონის გადაგდება და ახალი ფლაკონის გამოყენება. გახსნის თარიღი უნდა აღიონიშნოს ფლაკონის ეტიკეტზე და გარე შეფუთვაზე, სათანადოდ გამოყოფილ ადგილას.
არ საჭიროებს შენახვის განსაკუთრებულ პირობებს.
არ გამოიყენება თუ შეიმჩნევა დაზიანების ნიშნები ფლაკონზე და/ან შეფუთვაზე. ინახება თავისივე კოლოფში.
დაუშვებელია გამოუყენებელი ან ვადაგასული პრეპარატის გადაგდება! ნარჩენები უნდა ჩაბარდეს გარემოსა და ურბანიზაციის სამინისტროს მიერ გამოყოფილ სპეციალურ პუნქტში.