Erynit - ერინიტი 0.01გ 50 ტაბლეტი

გამოყენების ინსტრუქცია

ერინიტი

Erynit

პრეპარატის სავაჭრო დასახელება: ერინიტი

საერთაშორისო არადაპატენტებული დასახელება: პენტაერითრიტილის ტეტრანიტრატი

სამკურნალო ფორმა: ტაბლეტები;

შემადგენლობა:

ერთი ტაბლეტი შეიცავს ერინიტის ტაბლეტირებული გრანულირებული მასის - 0,25გ, რომლის შემადგენლობაში შედის:

მოქმედი ნივთიერება: ერინიტი - 0,01 გ

დამხმარე ნივთიერებები: საქაროზა - 0,08 გ, დექსტროზა - 0,08 გ, კარტოფილის სახამებელი - 0,075 გ, სტეარინის მჟავა - 0,0025 გ, ტალკი - 0,0025 გ.

აღწერა: თეთრი ფერის, ოდნავ მარმარილოს ფერის ორმაგად ამობურცული ტაბლეტები.

ფარმაკოთერაპიული ჯგუფი: ვაზოდილატაციური საშუალება.

კოდი ATX: (C01DA05)

ფარმაკოლოგიური თვისებები

ვენოზური ვაზოდილატატორი, გააჩნია ანტიანგინალური ეფექტი. სისხლძარღვთა კედლებში ასტიმულირებს აზოტის ოქსიდის წარმოქმნას, რომელიც წარმოადგენს ენდოთელური რელაქსაციის ფაქტორს. ამცირებს გულზე წინასწარ დატვირთვას (პერიფერიული ვენების გაფართოება და მარჯვენა წინაგულთან სისხლის ნაკადის შემცირება) და პოსტდატვირთვას (სისხლძარღვების საერთო პერიფერიული წინააღმდეგობა); ამცირებს მიოკარდიუმის მოთხოვნილებას ჟანგბადზე.

აღადგენს სისხლის ნაკადს მცირე ენდოკარდიალურ სისხლძარღვებში, აუმჯობესებს - ეპიკარდიალურ კორონარულ არტერიებში, ზრდის ტოლერანტობას ფიზიკური დატვირთვის მიმართ გულის იშემიური დაავადების (გიდ), სტენოკარდიის მქონე პაციენტებში.

გულის უკმარისობის დროს ხელს უწყობს მიოკარდიუმის განტვირთვას წინასწარი დატვირთვის შემცირების ხარჯზე. აქვეითებს წნევას სისხლის მიმოქცევის მცირე წრეში.

ნიტროგლიცერინთან შედარებით, ახდენს უფრო ნელ, მაგრამ უფრო ხანგრძლივ მოქმედებას (10 საათამდე). პერორალური მიღების დროს ეფექტი იწყება 30-45 წუთში (სუბლინგვალური მიღებისას - 15-20 წუთში), ხანგრძლივობა - 4-5 საათი.

გამოყენების ჩვენებები

სტენოკარდიის შეტევების პროფილაქტიკისათვის.

უკუჩვენებები

მომატებული მგრძნობელობა პრეპარატის და სხვა ორგანული ნიტრატების მიმართ, გამოხატული არტერიული ჰიპოტენზია, კოლაფსი, შოკი, ორთოსტატული ჰიპოტენზიით მიმდინარე მიოკარდიუმის მწვავე ინფარქტი, ჰემორაგიული ინსულტი, ქალა-ტვინის ტრავმა, ტვინის სისხლის მიმოქცევის დარღვევა (განსაკუთრებით ჰემორაგიული ინსულტი), დახურულკუთხოვანი გლაუკომა, ორსულობა, ლაქტაციის პერიოდი, ერთდროული მიღება ფოსფოდიესტერაზას ინჰიბიტორებთან, 18 წლამდე ასაკი (ეფექტურობა და უსაფრთხოება არ არის დადგენილი).

გამოყენების წესი და დოზირება:

პერორალურად (ჭამამდე 1 საათით ადრე) 10-20 მგ (1-2 ტაბლეტი) 3-4 ჯერ დღე-ღამეში, საჭიროების შემთხვევაში 40 მგ-მდე 4 ჯერ დღე-ღამეში, დასაშვებია 80 მგ მიღება 2 ჯერ დღე-ღამეში.

სტენოკარდიის ღამის შეტევების პრევენციისათვის ნიშნავენ 20 მგ ძილის წინ.

მკურნალობის კურსი ჩვეულებრივ გრძელდება 2-4 კვირა. განმეორებითი კურსი - ექიმის დანიშნულების მიხედვით.

გვერდითი მოქმედება:

ალერგიული რეაქციები, თავის ტკივილი, ყურებში ხმაური, თავბრუსხვევა, გულისრევა, სისუსტე, ტაქიკარდია, მომატებული დაღლილობა, შფოთვა, მომატებული ოფლიანობა, არტერიული წნევის დაქვეითება, ორთოსტატული ჰიპოტენზია; ზოგჯერ აღინიშნება კუჭ-ნაწლავის ფუნქციის დარღვევა (დიარეა).

ჭარბი დოზირება

მონაცემები ჭარბი დოზირების სიმპტომების შესახებ არ არსებობს.

ურთიერთქმედება სხვა სამკურნალო საშუალებებთან

სხვა სამკურნალო საშუალებებთან ერთდროული მიღების დროს მიმართეთ მკურნალ ექიმს კონსულტაციისათვის.

დიჰიდროერგოტამინის ზემოქმედების გამო შესაძლებელია ერინიტის ანტიანგინალური ეფექტის შემცირება. ამ სამკურნალო საშუალებების კომბინაცია ითვლება არარაციონალურად, რადგან ერინიტის ანტიანგინალური ეფექტი იზრდება. ეთანოლი აძლიერებს ერინიტის მოქმედებას.

განსაკუთრებული მითითებები

ეფექტის ნელი განვითარების გამო არ გამოიყენება სტენოკარდიის შეტევის კუპირებისათვის.

ხანგრძლივი გამოყენების დროს შესაძლებელია თერაპიული ეფექტის შემცირება (ტოლერანტობის განვითარების შედეგად).

პრეპარატის გამოყენებისას დღე-ღამეში ერთხელ სხვა ანტიანგინალურ სამკურნალო საშუალებებთან კომბინაციაში, ტოლერანტობის განვითარების რისკი მცირდება.

თერაპიის პროცესში უნდა გამოირიცხოს ალკოჰოლის მოხმარება.

მონაცემები სატრანსპორტო საშუალებების და მექანიზმების მართვის უნარზე პრეპარატის ზეგავლენის შესახებ არ არსებობს.

გამოშვების ფორმა

ტაბლეტები, 10 მგ

10 ტაბლეტი კონტურულ უჯრედოვან შეფუთვაში.

1 ან 5 კონტურული უჯრედოვანი შეფუთვა გამოყენების ინსტრუქციასთან ერთად მოთავსებულია ყუთში.

სტაციონარებისათვის: 420 კონტურული უჯრედოვანი შეფუთვა შესაბამისი რაოდენობის გამოყენების ინსტრუქციებთან ერთად მოთავსებულია მუყაოს ყუთში.

შენახვის პირობები

ინახება არა უმეტეს 25°C ტემპერატურაზე, სინათლისგან დაცულ, ბავშვებისათვის მიუწვდომელ ადგილას.

შენახვის ვადა

3 წელი.

არ გამოიყენოთ ვარგისიანობის ვადის გასვლის შემდეგ

აფთიაქიდან გაცემის წესი: ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი/პრეტენზიებს მიმღები ორგანიზაცია

შპს "ფარმაპოლ-ვოლგა"

446100, რუსეთი, სამარის ოლქი, ქ.ჩაპაევსკი, პიონერსკაია ქუჩა, სახლი 1,

ტელ./ფაქსი: (84639) 20801

საწარმოო მოედნის მისამართი:

446100, რუსეთი, სამარის ოლქი, ქ.ჩაპაევსკი, პროიზვოდსტვენაია ქუჩა, სახლი 4.

შპს "ფარმაპოლ-ვოლგას"

დირექტორი   (ბეჭედი) (ხელმოწერა)  პ.ი.პრიეზჟევი