SOLPRENE - სოლპრენე თვალის წვეთი 5მლ

SOLPRENE - სოლპრენე თვალის წვეთი 5მლ

ნაჩვენებია ამ სამკურნალწამლო პროდუქტის გამოყენება თვალის წინამდებარე სტრუქტურების ანთებითი და ალერგიული მდგომარეობების დროს, რომლებიც ასევე მოიცავენ მიკრობულ კომპონენტსაც.
5.5 მგ/მლ + 3.5 მგ/მლ თვალის წვეთები, ხსნარი
პრედნიზოლონი, ნეომიცინი
რა არის Solprene® და რისთვის ხდება მისი გამოყენება:
Solprene® არის თვალების სამკურნალოდ მოწოდებული პრეპარატი, რომელიც შეიცავს 2 სხვადასხვა აქტიური ნივთიერების კომბინაციას. პრედნიზოლონი წარმოადგენს ნივთიერებას,
რომელიც ხელს უშლის ანთების განვითარებას ანდა ამცირებს მის გამოხატულებას, ხოლო ნეომიცინს კი გააჩნია ანტი-ბაქტერიული მოქმედების ეფექტი. ნაჩვენებია ამ სამკურნალწამლო
პროდუქტის გამოყენება თვალის წინამდებარე სტრუქტურების ანთებითი და ალერგიული მდგომარეობების დროს, რომლებიც ასევე მოიცავენ მიკრობულ კომპონენტსაც.
რა უნდა ვიცოდეთ Solprene®-ს გამოყენების დაწყებამდე:
არ გამოიყენოთ Solprene® იმ შემთხვევაში:
· თუკი თქვენ ხართ ალერგიული პრედნიზოლონის, ნეომიცინის ან ამ წამლის შემადგენლობაში შემავალი სხვა რომელიმე ინგრედიენტის მიმართ (წამლის სრული შემადგენლობა წარმოდგენილია მე-6 სექციაში);
· თუკი თქვენი თვალშიდა წნევა არის უჩვეულოდ მაღალი (ოკულარული ჰიპერტენზია);
· თუკი თქვენ გაქვთ თვალის ვირუსული ინფექცია (მაგ., როგორიც არის აქტიური მარტივი ჰერპესი ან თვალის რომელიმე სხვა ვირუსული დაავადება), გარდა იმ შემთხვევებისა, თუკი პარალელურად მიმდინარეობს მისი მკურნალობა ჰერპესის ვირუსის საწინააღმდეგო სპეციფიური წამლებით;
· თუკი თქვენ გაქვთ თვალის კონიუნქტივალური გარსის (გამჭვირვალე აპკი, რომელიც ფარავს თვალის სხეულსა და თვალის ქუთუთოების შიგნითა ზედაპირს) ან რქოვანა გარსის (თვალის სხეულის შემადგენელი ნაწილი) დაზიანებებით მიმდინარე ანთება (კონიუნქტივიტი წყლულოვან კერატიტთან ერთად), მის საწყის ეტაპზეც კი (დადებითი ფლუორესცეინის ტესტი);
· თუკი თქვენ გაქვთ თვალის ტუბერკულოზი (თვალის მძიმე ანთება);
· თუკი თქვენ გაქვთ თვალის სოკოვანი ინფექცია (თვალის მიკოზი);
· თუკი თქვენ გაქვთ ჩირქის გამოყოფით მიმდინარე თვალის ანთება (თვალის მწვავე ჩირქოვანი ანთება);
· თუკი თქვენ გაქვთ თვალის ქუთუთოების შიგნითა ზედაპირის მფარავი გამჭვირვალე აპკის ჩირქის გამოყოფით მიმდინარე ანთება (ჩირქოვანი კონიუნქტივიტი);
· თუკი თქვენ გაქვთ ჩირქოვანი ჰერპესული ბლეფარიტი (თვალის ქუთუთოების მარტივი ჰერპესის ვირუსით გამოწვეული და ჩირქის გამოყოფით მიმდინარე ანთება);
· თუკი თქვენ გაქვთ ჯიბლიბო (თვალის წამწამების ცხიმოვანი ჯირკვლების ანთება, რომელიც წააგავს ჩირქოვან მუწუკებს).
გაფრთხილებები და სიფრთხილის ზომები:
Solprene®-ს გამოყენების დაწყებამდე გაესაუბრეთ თქვენს ექიმს ან ფარმაცევტს.
Solprene®-ს გამოყენების დროს გამოიჩინეთ განსაკუთრებული ყურადღება იმ შემთხვევაში:
· თუკი თქვენ ეს წამალი უნდა გამოიყენოთ ხანგრძლივი დროის განმავლობაში. Solprene®-ს ხანგრძლივმა გამოყენებამ შეიძლება გამოიწვიოს გვერდითი მოვლენების განვითარება. არ არის რეკომენდებული ამ წამლის თვალში უწყვეტად ჩაწვეთება/აპლიკაცია 1 თვეზე მეტი ხნის განმავლობაში; იმ შემთხვევაში, თუკი აბსოლუტურად აუცილებელია ამ წამლის ხანგრძლივი გამოყენება, მაშინ ხშირად უნდა იქნეს განხორციელებული თვალშიდა წნევის გაზომვა (მონიტორინგი). გარდა ამისა, ამ სამკურნალწამლო პროდუქტის ხანგრძლივმა გამოყენებამ შეიძლება ხელი შეუწყოს რეზისტენტული მიკროორგანიზმების ზრდას, სოკოვანი მიკროორგანიზმების ჩათვლით, რამაც, თავის მხრივ, შეიძლება გამოიწვიოს სხვა სახის ინფექციის განვითარება.
· თუკი მკურნალობის მიმდინარეობის დროს თქვენ გაგინვითარდებათ სხვა სახის ინფექცია (მაგ., სოკოვანი ინფექცია), ანდა თვალის გაღიზიანების ან ჰიპერმგრძნობელობის კლინიკური ნიშნები, მაშინ თქვენ უნდა შეწყვიტოთ Solprene®-ს გამოყენება და შესაბამისი მკურნალობის დანიშვნის მიზნით მიმართოთ თქვენს ექიმს.
· თუკი თქვენ გაქვთ იმგვარი ავადმყოფობა, რომელიც იწვევს თვალის რქოვანა გარსის ან სკლერის (თვალის მფარავი გარსების) გათხელებას, მაშინ Solprene®-ს მსგავსი წამლების თვალშიდა გამოყენებამ შეიძლება გამოიწვიოს ამ გარსების გახვრეტა (პერფორაცია).
· თუკი თქვენ გაქვთ თვალის რქოვანა გარსის ვირუსული ინფექცია (მაგ.,ჰერპესის ვირუსით გამოწვეული კერატიტი), მაშინ ასეთ შემთხვევაში არ არის რეკომენდებული ამ წამლის გამოყენება (იხ. სექცია „არ გამოიყენოთ Solprene®“). თუკი თქვენი ექიმი მიიჩნევს, რომ თქვენთვის აბსოლუტურად აუცილებელია Solprene®-ს მიღება, მაშინ ეს ნებადართული უნდა იყოს ექიმ ოფთალმოლოგის ზედმიწევნითი დაკვირვება-მეთვალყურეობის ფარგლებში.
Solprene®-ს გამოყენება სხვა წამლებთან ერთად:
აცნობეთ თქვენს ექიმს ან ფარმაცევტს, თუკი თქვენ მიმდინარედ იღებთ, ან ბოლოხანს იღებდით ან სამომავლოდ აპირებთ რომელიმე სხვა წამლის მიღებას. დღეს-დღეობით ცნობილი არ არის ურთიერთქმედების არსებობა რომელიმე სხვა წამალთან.
ორსულობა და ლაქტაცია:
იმ შემთხვევაში, თუკი თქვენ ხართ ორსულად ან ხართ მეძუძური დედა, ანდა ჩათვლით რომ ხართ ორსულად, ანდა დააპირებთ ბავშვის ყოლას, მაშინ ამ წამლის მიღების დაწყებამდე რჩევისათვის მიმართეთ თქვენს ექიმს ან ფარმაცევტს.
ორსულობის დროს Solprene®-ს გამოყენება უნდა მოხდეს მხოლოდ მისი აბსოლუტური ჩვენებით (აუცილებლობის შემთხვევაში) და უშუალო სამედიცინო დაკვირვება- მეთვალყურეობის ქვეშ.
სატრანსპორტო საშუალებების მართვა და ხელსაწყო-დანადგარების გამოყენება:
გამოვლენილი არ ყოფილა სატრანსპორტო საშუალებების მართვისა და ხელსაწყო- დანადგარების გამოყენების უნარზე წამლის ზემოქმედების რაიმე ეფექტის არსებობა.
როგორ უნდა გამოვიყენოთ Solprene®:
ეს წამალი ყოველთვის გამოიყენეთ ზუსტად ისე, როგორც ამას თქვენ გეტყვით თქვენი ექიმი. გაუგებრობის შემთხვევაში, კიდევ ერთხელ გადაამოწმეთ გამოყენების წესები თქვენს ექიმთან ან
ფარმაცევტთან.
წამლის რეკომენდებული დოზა: ერთი (1) წვეთის ჩაწვეთება კონიუნქტივალურ ჩანთაში დღეში 4 – 6-ჯერ ან მეტჯერ, ექიმის დანიშნულების შესაბამისად.
თუკი თქვენ გამოიყენებთ Solprene®-ს დანიშნულზე მეტი ოდენობით:
Solprene®-ს ჭარბი დოზის გამოყენების / ჩაყლაპვის შემთხვევაში აცნობეთ ამის შესახებ თქვენს ექიმს ან დაუყოვლებლივ მიმართეთ ადგილობრივ საავადმყოფოს.
თუკი თქვენ დაგავიწყდათ Solprene®-ს გამოყენება:
არ გამოიყენთ ორმაგი დოზა გამოტოვებული დოზის ანაზღაურების მიზნით.
თუკი თქვენ გექნებათ რაიმე სახის სხვა შეკითხვები ამ წამლის გამოყენებასთან მიმართებაში, მაშინ დაუსვით ეს შეკითხვები თქვენს ექიმს ან ფარმაცევტს.
შესაძლო გვერდითი მოვლენები:
ისევე როგორც ყველა სხვა წამლის შემთხვევაში, Solprene®-ს გამოყენებასაც შეიძლება თან სდევდეს გვერდითი მოვლენები, თუმცა მათს განვითარებას ადგილი არ ექნება ყველა შემთხვევაში. Solprene®-ს გამოყენებამ შესაძლოა გამოიწვიოს შემდეგი გვერდითი მოვლენების განვითარება:
· თვალის ადგილობრივი გაღიზიანება (დროებით);
· თვალში ჩხვლეტის ან წვის შეგრძნება (იშვიათ შემთხვევებში).
გვერდითი მოვლენების მოხსენება:
იმ შემთხვევაში, თუკი თქვენ გაგინვითარდებათ რაიმე სახის გვერდითი მოვლენა, მაშინ აცნობეთ ამის შესახებ თქვენს ექიმს ან ფარმაცევტს. აღნიშნული მოიცავს იმ ნებისმიერ შესაძლო გვერდით მოვლენებსაც, რომლებიც ჩამოთვლილნი არ არიან წინამდებარე ჩანართ ფურცელში წარმოდგენილ ნუსხაში. თქვენ ასევე შეგიძლიათ პირდაპირი წესით მოახსენოთ გვერდითი მოვლენების განვითარების შესახებ ანგარიშგების ეროვნული სისტემის გამოყენების მეშვეობით. გვერდითი მოვლენების მოხსენების საფუძველზე თქვენ ხელს შეუწყობთ ამ წამლის უსაფრთხოების შესახებ არსებული უფრო მეტი ინფორმაციის მოძიებასა და ანგარიშგებას.
როგორ უნდა შევინახოთ Solprene®
შეინახეთ ეს წამალი ბავშვებისათვის ხელმიუწვდომელ ადგილზე.
არ გამოიყენოთ ეს წამალი მის შეფუთვის ტარაზე მითითებული ვარგისიანობის ვადის გასვლის შემდეგ. ვარგისიანობის ვადა ძალაშია ეტიკეტზე მითითებული თვის ბოლო დღემდე.
გამოიყენეთ ეს პროდუქტი მისი თავდაპირველი გახსნიდან 30 დღის განმავლობაში.
შეინახეთ წამალი 25°C-ზე დაბალ ტემპერატურაზე.
არ გადააგდოთ წამალი კანალიზაციაში ან საყოფაცხოვრებო ნარჩენებთან ერთად. ჰკითხეთ თქვენს ფარმაცევტს, თუ როგორ უნდა გადააგდოთ ნებისმიერი ის წამალი, რომელიც თქვენ
აღარ გჭირდებათ. აღნიშნული ზომები ხელს შეუწყობენ და უზრუნველყოფენ გარემოს დაცვას.
შეფუთვის შემადგენლობა და სხვა დეტალები
რას შეიცავს Solprene®:
· აქტიურ ნივთიერებებს წარმოადგენენ პრედნიზოლონის ნატრიუმის ფოსფატი და ნეომიცინის სულფატი. წამლის 1 მლ შეიცავს 5.5 მგ პრედნიზოლონის ნატრიუმის ფოსფატს და ნეომიცინის სულფატს (ექვივალენტურია 3.5 მგ ნეომიცინისა).
· სხვა ინგრედიენტები: ორფუძიანი ნატრიუმის ფოსფატი, ერთფუძიანი ნატრიუმის ფოსფატი, ნატრაიუმის ჰიალურონატი, ნატრიუმის ციტრატი, ნატრიუმის მეტაბისულფიტი, 2-ფენილ- ეთანოლი, პოლიეთილენგლიკოლი 4000 და საინექციო წყალი.
როგორ გამოიყურება Solprene® და მისი შეფუთვის შიგთავსი: Solprene® წარმოდგენილია თვალის წვეთების სახით და იგი დაფასოებულია 5 მლ მოცულობის მქონე საწვეთურა ბოთლში.